AbdulRahman bin Badie

ياسعود يامشكـاي ويـش التدابيـر=لاتشتكي بـاس السنيـن وشطفهـا
جور السنين يحل ويمـر ويصيـر=راجع زمانك واكثر النـاس شفهـا
الناس لاحقها من الوقـت تاثييـر=وتصبر على جور السنين وصلفها
هذي السنين اتزين واتشين وتغيـر=وان وصفت بتعذب اللي وصفهـا
فحرص على قرب الرجال المناعير=اللـي دروب المرجلـه تحترفهـا
تلقى في خوتهـم معـزه وتقديـر=ومجالسٍ مادنسـت مـن عرفهـا
تاقف معك لو همك اكبر من النيـر=وبعزمها حتى الصعـاب اتعسفهـا
ولا قدر الله ثـم رمتـك المقاديـر=الرجـل منهـم وقفتـه لا وقفهـا
تسوا لها فزعة صفوف وطوابيـر=ماهوب لا شاف الصمايل حرفهـا
يقلط على الشده كما سالـم الزيـر=وتامن به الديره وهو فـي طرفهـا
لامازهمته قام يشتح كمـا الطيـر=لاضـف جنحانـه وكفـه عكفهـا
واهل الردى مالك وراها مداويـر=جنـب مجالسهـا وجنـب ولفهـا
لو اضحكتلك في السنين المياسيـر=لابد فـي وقـت القسـا تكتشفهـا
تفِرح بك الشمات لو ذنبك اصغيـر=وتحتار في اصغر غلطةٍ تقترفهـا
ويصير همك كبر هضبة شمنصير=لكـن جنـب معرفتهـا وعفـهـا
لانذال رفقتهـا مهونـه وتقصيـر=وتِكثر عنا نفسك وتكِثـر حسفهـا
فالرفقه اللي ماتدلـك علـى خيـر=آللّّـه يلعنهـا ويلـعـن جدفـهـا
ولا تـرادع جاهليـن المحاضيـر=ولو تعترض لك كلمة اللاش طفهـا
واحفظ السانك لو بلـوك المعاثيـر=الكلمه اللـي دون ميـزان خفهـا
يجوز ترمـي كلمـة دون تفكيـر=واصبح سودان القلـوب اتخطفهـا
واصدر لياما عفت صدارت ابعيـر=لاترتجيها 00 واطلـب الله خلفهـا
وترا النصيب يصيب مافيه تغييـر=لو تجبد امـواج البحـر وتغرفهـا
وعذر الرجال الطيبه خله ايسيـر=ابيـك تعذرهـا وتقبـل وسفـهـا
العذر يقبل لاحصـل فيـه تبريـر=امن الرجال اللي صريـحٍ هدفهـا
في كل شي قـد تجـوز المعاذيـر=الا على اعراض الرجال وشرفهـا
اقولها وانا الـذي سلوتـي غيـر=البعد عن ضيق البيـوت وكنفهـا
واسج في خبت كستـه النواويـر=حيثه ظفر روحي وحيثـه نصفهـا
واسواق الاسهم والذهب والدنانيـر=لو سلموها فـي يـديّ اصطرفهـا
ينوبها ملحاٍ مـن ابـل المناصيـر=ارعابها زهـر الفيـاض وقطفهـا

من روائع الشاعر / عبد الرحمن بن بديع